Quba rayonunda kənd turizminin inkişafı üçün “www.kendegel.az” portalı yaradılacaq. Bu məqsədlə İqtisadiyyat Nazirliyi yanında Kiçik və Orta Biznesin İnkişafı Agentliyinin (KOBİA) Xaçmaz KOB İnkişaf Mərkəzi Quba rayonunda fəaliyyət göstərən KOB subyektinə fərdi məsləhət xidmətləri göstərib.

PR4B KOBİA-ya istinadən verdiyi məlumata görə, peşəkar və təcrübəli ekspertin iştirakı ilə portalda yerləşdiriləcək Qubanın Yuxarı Xanəgah, Nügədi, Qımılqışlaq, Qəçrəş, Təngəaltı və Qrız kəndlərində yerləşən evlərin sahibləri ilə görüş keçirilib, portalın yaradılmasının ev sahiblərinə verəcəyi üstünlüklər, gəlirlərinin artmasına təsiri müzakirə edilib, kənd turizminin inkişafında evlər üçün minimal tələb və standartlar haqqında ətraflı məlumat verilib.

Yaradılacaq “www.kendegel.az” portalı yerli və xarici turistlərə istirahətinin Quba rayonunda planlaşdırılmasında dəstək olacaq. Belə ki, portal turistlərə qeyd olunan kəndlərdəki evlər, onların qiyməti, tarixi abidələr, ekskursiya yerləri, vaxın səmərəli keçirilməsi üçün təklif olunan xidmətlər barədə ərtaflı məlumat əldə etmək imkanı yaradacaq.