Arzuladığınız şirkət və ya bank PR mütəxəssisi üzrə vakansiya elan edib və ağlınıza ilk olaraq bir sual gəlir, “Mən PR-çı ola bilərəmmi?”.
Biz sizə yardımçı olaq.
PR nədir?
PR (Public Relations) və ya İctimaiyyətlə Əlaqələr, təşkilatın məqsədləri istiqamətində özü üçün inkişaf etdirdiyi tərifin ictimaiyyət tərəfindən eyni formada qəbul edilməsini təmin edəcək fəaliyyətlər toplusudur. PR-ın hazırladığı strategiyalar, həyata keçirdiyi texnikalar sayəsində təşkilatların fikirləri və xidmətləri cəmiyyət tərəfindən daha yaxşı anlaşılır və qəbul olunur.
PR – hər hansı mal, insan, şirkət, hadisə haqqında ictimai rəyin formalaşmasıdır. O, şirkətin mənfəət əldə etməsi üçün deyil, yalnız alıcının maraqlarına uyğun mallar buraxması və satması haqqında təsəvvür yaratmaq yolu ilə ictimaiyyətin şirkətə yaxşı münasibətini formalaşdırmaq bacarığıdır.
PR, əlaqələr inşa edir. Bu gün texnologiyanın sayəsində informasiya axımı son dərəcə sürətlidir. Bu sürətli əlaqələr içərisində PR bütün informasiya elementləri ilə əməkdaşlıq edir.
PR-çı bir markanın həm içindən bir çalışan, həm də çöldən obyektiv bir göz olaraq işləyir. Markanın istehlakçısı ilə uğurlu ünsiyyət qurması üçün lazımlı olan alt təməli yaradır və inkişaf etdirir.
PR-çı olmaq üçün nə lazımdır?
İlk öncə ali təhsil vacibdir. Adətən bir çox PR-çının keçmiş karyerasına nəzər salsaq görərik ki, onda jurnalistikanın izləri var. Odur ki, bu sahədə çalışan şəxslərin jurnalistika təhsilinin və ya jurnalistika sahəsində təcrübəsinin olması tələb olunur. Dil və kompüter biliklərinin olması da olduqca önəmlidir. PR-çılar şəxsi keyfiyyətlərə malik olmalıdırlar. Onlar üçün ən unikal keyfiyyət- ünsiyyətcil olmaqdır. Çünki PR-çı nəinki digər şirkət və qurumlarla, eyni zamanda cəmiyyətlə ünsiyyətdədir. Bu mütəxəssislər müxtəlif sektorlarla əlaqələr qurmalı, həmçinin yenilərini istənilən səviyyədə nizamlaya bilməlidir.
Məncə: Banco.az
